ភ្នំពេញ ៖ មានការភ្ញាក់ផ្អើលយ៉ាងខ្លាំងផ្ទុះចេញពីបណ្តាញសង្គមហ្វេសប៊ុក និងគេហទំព័រyoutube ខណៈប្រជាពលរដ្ឋថៃនាំគ្នាប្រកែកគ្នាវែកញែកពោរពេញដោយការរិះគន់ទៅនឹងបទចម្រៀងខ្មែរមួយបទ ដែលច្រៀងដោយតារាចម្រៀងផលិតកម្មហង្សមាសសាពូន មីដាដា ដោយពួកគេចោទប្រកាន់ដោយត្រង់ៗថាបទនោះជាបទដើមរបស់បទចម្រៀងថៃ។
បទចម្រៀងដែលបកស្រាយដោយតារាចម្រៀងមនោសញ្ចេតនា លោក សាពូន មីដាដា និងធ្វើឲ្យប្រជាពលរដ្ឋថៃឈ្លោះប្រកែកគ្នាកក្រើកក្នុងហ្វេសប៊ុកនោះមានចំណងជើងថា «ភ្លេចដកដង្ហើមងាយជាងភ្លេចមនុស្សដែលខ្លួនស្រឡាញ់» ដែលបទនេះត្រូវបានប្រជាជនថៃរិះគន់និងចោទប្រកាន់ថា បានលួចចម្លងទាំងបទភ្លេងនិងកាយវិការសម្តែងពីបទដើមរបស់បទចម្រៀងថៃ។ ពួកគេនោះមិនបានបញ្ជាក់ពីបទដើមរបស់គេថាមានចំណងជើងយ៉ាងណា និងច្រៀងដោយតារាចម្រៀងថៃល្បីរូបណានោះទេ ប៉ុន្តែពួកគេបានបញ្ជាក់ពីកាលបរិច្ឆេទនៃការចេញស្នាដៃដើមរបស់ពួកគេថា បទចម្រៀងដើមរបស់ថៃផលិតនៅឆ្នាំ២០១០ដោយបានបង្ហោះក្នុងyoutube មានអ្នកគាំទ្រជិត២លាននាក់។ រីឯបទចម្រៀងខ្មែរផលិតនិងចែកចាយដោយផលិតកម្មហង្សមាស យកលំនាំបទចម្រៀងថៃ នោះធ្វើឡើងនៅឆ្នាំ២០១១ ដែលមុនដំបូងផលិតជា Audio CD និងក្រោយមកផលិតជាVCD ។
បើទោះជាយ៉ាងណា ក្រុមប្រជាពលរដ្ឋដែលយកវេទិការបណ្តាញសង្គមធ្វើជាតុមូលវែកញែកនិងប្រតិកម្មទៅនឹងបទចម្រៀង«ភ្លេចដកដង្ហើមងាយជាងភ្លេចមនុស្សដែលខ្លួនស្រឡាញ់» ដែលច្រៀងដោយតារាចម្រៀងមនោសញ្ចេតនាបែបប្រចាំផលិតកម្មហង្សមាស ដែលល្បីថាជាអ្នកនិពន្ធទាំងបទច្រៀងនិងទំនុកភ្លេងដោយខ្លួនឯងលោក សាពូន មីដាដា នោះពួកគេមិនបានបង្ហាញពីឆន្ទៈចង់ប្តឹងតវ៉ា ទាមទារកម្មសិទ្ធិបញ្ញាមកដល់ក្រុមអ្នកផលិតចម្រៀងខ្មែរនោះទេ ។
នៅរសៀលម្សិលម៉ិញនេះខណៈដែលភ្នំពេញ ប៉ុស្តិ៍ទាក់ទងទូរស័ព្ទទៅនៅវេលាម៉ោង១១ និង៥៥នាទីលោក សាពូន មីដាដា តបមកវិញសំឡេងខ្សាវៗហើយនៅពេលឮថា ទូរស័ព្ទពីខាងកាសែតភ្នំពេញប៉ុស្តិ៍នោះ តារាចម្រៀងរូបនេះបែរជាចុចផ្តាច់ទំនាក់ទំនងបើទោះជាព្យាយាមភ្ជាប់ទំនាក់ទំនងទៅយ៉ាងណាក៏មិនទទួលដែរ។ ដោយឡែកខាងផលិតកម្មក៏យើងមិនអាចទាក់ទងបានដែរ កាលពីរសៀលថ្ងៃពុធម្សិលមិញ។
ពាក់ព័ន្ធនឹងការលួចចម្លងស្នាដៃនៅកម្ពុជានេះ គេបានដឹងថា វប្បធម៌នៃការលួចចម្លងពីបរទេសដោយម្ចាស់ផលិតកម្មនិងក្រុមហ៊ុនមួយចំនួននៅប្រទេសកម្ពុជាបានកើតមានឡើងជាយូរឆ្នាំមកហើយ ហើយក៏ធ្លាប់ម្ចាស់ផលិតផលដើមនៅឯបរទេសបញ្ចេញនូវប្រតិកម្មខឹងសម្បារិះគន់យ៉ាងចាស់ដៃមកលើភាគីខ្មែរផងដែរនាពេលកន្លងមក។
ទាក់ទិននឹងការលួចចម្លងស្នាដៃនេះដែរ ក្រុមអ្នកវិភាគបានចាត់ទុកថាជាការប៉ះពាល់ដល់សង្គមខ្មែរផងដែរ ដោយពួកគេលើកឡើងថា អំពើនេះធ្វើឲ្យខ្មែរបាត់បង់នូវតម្លៃផលិតចេញជាស្នាដៃផ្សេងៗ ដោយសារការលួចចម្លងពីគេ។
តែយ៉ាងណានេះមិនមែនជាលើកទីមួយឡើយ ដែលការផលិតបទចម្រៀងរបស់ហង្សមាស រងការចោទប្រកាន់ពីការលួចចម្លងបទដើមពីគេនោះ កន្លងមកថ្មីៗនេះណុប បាយ៉ារិទ្ធិ ក៏ត្រូវបានទូរទស្សន៍កូរ៉េខាងត្បូងKBS ចោទថា បានយកត្រាប់តាមតារាគេដែរ៕
ប្រភព : ភ្នំពេញប៉ុស្តិ៍
