កេនយ៉ា៖ បើយោងតាមទីភ្នាក់ងារសារព័ត៌មាន Channnel News Asia ចុះថ្ងៃទី៣០ ខែសីហា ឆ្នាំ២០១៣ បានឲ្យដឹងថា មានមនុស្សយ៉ាងហោចណាស់ ៤១នាក់បានស្លាប់ និង២៧នាក់ផ្សេងទៀតបានរងរបួស ក្នុងហេតុការណ៍ក្រឡាប់រថយន្តដឹកអ្នកដំណើរមួយគ្រឿង កាលពីថ្ងៃព្រហស្បតិ៍ ទី២៩ ខែសីហា ឆ្នាំ ២០១៣ នៅក្នុងតំបន់ភាគខាងលិច រដ្ឋធានី Nairobi ប្រទេសកេនយ៉ា។
បើតាមសម្តីរបស់សមត្ថកិច្ចមូលដ្ឋានបានឲ្យដឹងថា គ្រោះថ្នាក់ដ៏អាក្រក់នេះអាចបង្កឡើងដោយសារតែរថយន្តបានបើកបរហួសល្បឿនកំណត់ ទើបធ្វើឲ្យរថយន្តបានជ្រុលល្បឿនធ្លាក់ពីលើជម្រាលផ្លូវក្រឡាប់ជាច្រើនជុំ បណ្តាលឲ្យអ្នកជិះក្នុងរថយន្តបោកផ្ទប់គ្នា ចំណែកអ្នកខ្លះបានខ្ទាតចេញទៅខាងក្រៅរថយន្ត។
ប្រភពដដែលបានបន្តទៀតថា រថយន្តនេះបានធ្វើដំណើរពីទីក្រុង Nairobi ទៅកាន់ Homa Bay ហើយហេតុការណ៍នេះ អាចចាត់ទុកថាជាព្រឹត្តិការណ៍គ្រោះថ្នាក់ចរាចរណ៍ដ៏អាក្រក់មួយដែលមិនធ្លាប់កើតមានក្នុងតំបន់នេះ។ ជុំវិញកន្លែងកើតហេតុ គឺមានសភាពគួរឲ្យរន្ធត់ជាខ្លាំង ដោយសារតែបានប្រទះឃើញសាកសព និងអ្នករបួសនៅរាយប៉ាយពេញផ្លូវ៕
